ഫാ. തിയോഫിലസ് പാണ്ടിപ്പിള്ളി ദൈവദാസ പദവി പ്രഖ്യാപനം : ബൈബിളും ഉണ്ണീശോയുടെ രൂപവും കൈമാറി

മടപ്പാതുരുത്ത് : ഫാ. തിയോഫിലസ് പാണ്ടിപ്പിള്ളിയുടെ ദൈവദാസ പദവി പ്രഖ്യാപനത്തിനു മുന്നോടിയായി ഫാ.പാണ്ടിപ്പിള്ളി ഉപയോഗിച്ചിരുന്ന രണ്ട് ബൈബിളുകളും ഉണ്ണീശോയുടെ രൂപവും മടപ്ലാതുരുത്ത് സെൻറ് ജോർജ് ദേവാലയത്തിന് കൈമാറി. ഫാ. പാണ്ടിപ്പിള്ളി ജീവിതസായാഹ്നത്തിൽ ചിലവഴിച്ച മടപ്ലാതുരുത്തിലെ പാറക്കാട്ട് ലൂയിസിന്റെ ഭവനത്തിൽ നിന്ന് ദൈവദാ സ പദവി പ്രഖ്യാപന കമ്മിറ്റി ജനറൽ കൺവീനറും കോട്ടപ്പുറം രൂപത വികാരി ജനറലുമായ മോൺ.ഡോ. ആൻറണി കുരിശിങ്കൽ ഉണ്ണീശോയുടെ രൂപവും പാണ്ടിപ്പിള്ളി അച്ചന്റെ കുടുംബാംഗമായ ഫാ. ഫ്രാൻസിസ് പാണ്ടിപ്പിള്ളി ഒസിഡയും കോട്ടപ്പുറം രൂപത ബിസിസി ഡയറക്ടർ ഫാ. നിമേഷ് കാട്ടാശ്ശേരിയും ബൈബിളുകളും സ്വീകരിച്ചു .തുടർന്ന് അനേകം വിശ്വാസികളുടെ അകമ്പടിയോടെ പ്രദക്ഷിണമായി അവ മടപ്ലാതുരുത്ത് പള്ളിയിലേക്ക് കൊണ്ടുവന്നു. ദൈവദാസ പദവി പ്രഖ്യാപനത്തിന്റെ ജോയിന്റ് ജനറൽ കൺവീനറും മടപ്ലാതുരുത്ത് സെന്റ് ജോർജ് പള്ളി വികാരിയുമായ ഫാ. ജോസ് കോട്ടപ്പുറം ബൈബിളുകളും ഉണ്ണീശോയുടെ രൂപവും മടപ്ലാതുരുത്ത് പള്ളിയിൽ ഏറ്റുവാങ്ങി. കോട്ടപ്പുറം രൂപത ചാൻസലർ റവ.ഡോ. ബെന്നി വാഴക്കൂട്ടത്തിൽ സന്നിഹിതനായിരുന്നു. ഇതിനു മുന്നോടിയായി പള്ളിയിൽ നടന്ന ദിവ്യബലിക്ക് മോൺ. ഡോ.ആൻറണി കുരിശിങ്കല്‍ മുഖ്യകാർമികത്വം വഹിച്ചു. ഫാ. ഫ്രാൻസിസ് പാണ്ടിപ്പള്ളി ഒസിഡി വചനപ്രഘോഷണം നടത്തി.ഫാ. നിമേഷ് കാട്ടാശ്ശേരി സഹകാർമികനായി. ഇനി ബൈബിളുകളും ഉണ്ണീശോയുടെ രൂപവും മടപ്ലാതുരുത്ത് സെന്റ് ജോർജ് പള്ളിയിൽ സൂക്ഷിക്കും.

തിയോഫിലസ് പാണ്ടിപ്പിള്ളി അച്ചന്റെ ദൈവദാസ പദവി  പ്രഖ്യാപനം 75ാം ചരമവാർഷിക ദിനമായ 2022 ഡിസംബർ 26 ന് വൈകീട്ട് 3 ന് മടപ്ലാതുരുത്ത് സെന്റ് ജോർജ് ദേവാലയത്തിൽ നടക്കും. ഇതോടനുബന്ധിച്ച് നടക്കുന്ന സമൂഹ ദിവ്യബലി മധ്യേയാണ് തിയോഫിലസ് പാണ്ടിപ്പിള്ളിയച്ചനെ ദൈവദാസനായി പ്രഖ്യാപിക്കുന്നത്.ആന്മീയത സഹോദരസ്നേഹത്തിലൂടെ പ്രകടമാക്കിയ വ്യക്തിയാണ് ഫാ. പാണ്ടിപ്പിള്ളി. തീക്ഷ്ണമതിയായ സാമൂഹ്യ പരിഷ്കർത്താവായിരുന്നു അദ്ദേഹം. സാമൂഹ്യ പ്രവർത്തന രംഗത്ത് ഇന്ന് കൊട്ടിഘോഷിക്കപ്പെടുന്ന സ്ത്രീശാക്‌തീകരണം, സ്വയം തൊഴിൽ പദ്ധതികൾ, സമൂഹ വിവാഹം, ഭവനം നിർമ്മിച്ചു നൽകൽ, വ്യദ്ധജനസംരക്ഷണം, പാപപ്പെട്ടവർക്ക് ആഹാര സാധനങ്ങൾഎത്തിച്ചു കൊടുക്കൽ തുടങ്ങിയവ ഏഴര പതിറ്റാണ്ടിനപ്പുറം അദ്ദേഹം ആവിഷ്ക്കരിച്ച് നടപ്പാക്കി. ജാതി മത ഭേദമന്യേ എല്ലാവരും അദ്ദേഹത്തിന്റെ കാരുണ്യ മനുഭവിച്ചു.വടക്കേക്കര പഞ്ചായത്തിൽ വാവക്കാട് ഗ്രാമത്തിൽ 1860 ഒക്ടോബർ 10 നായിരുന്നു പാണ്ടിപ്പിള്ളിയച്ചന്റെ ജനനം. 1947 ഡിസംബർ 26 ന് മടപ്ലാതുരുത്തിൽ ദിവംഗതനായി.

ഫോട്ടോ: ഫാ. തിയോഫിലസ് പാണ്ടിപ്പിള്ളിയുടെ ദൈവദാസ പദവി പ്രഖ്യാപനത്തോട് അനുബന്ധിച്ച് അദ്ദേഹം ഉപയോഗിച്ചിരുന്ന ബൈബിളുകളും ഉണ്ണീശോയുടെ രൂപവും പാറക്കാട്ട് ലൂയിസിന്റെ ഭവനത്തിൽ നിന്ന് മടപ്ലാതുരുത്ത് പള്ളിയിലേക്ക് പ്രദക്ഷിമായി സംവഹിക്കുന്നു. ഫാ. നിമേഷ് കാട്ടാശ്ശേരി, , മോൺ. ഡോ.ആൻറണി കുരിശിങ്കൽ ,ഫാ. ഫ്രാൻസിസ് പാണ്ടിപ്പിള്ളി ഒസിഡി ,ഫാ.ജോസ് കോട്ടപ്പുറം തുടങ്ങിയവരെയും കാണാം.